Magaral Tayo

Bibliya lang daw ang dapat na basehan ng pananampalatayang Kristiyano. Pero kung titingnan natin ang mga grupong nagsasabi ng ganyan, mapapansing kahit sila mismo ay hindi magkatugma sa kani-kanilang pananampalataya. Kung bubuksan mo ang TV at Radio, maririnig mo pa silang nagbabangayan at tumutuligsa sa bawa't isa. Hindi mahirap hulaan kung sino ang mga yan. Iglesya ni Manalo, Iglesya ni Ka Eli Soriano, Grupo ni Quiboloy, at ang iba't ibang grupong "Born Again." Lahat ng iyan ay nagsasabing ang kanilang mga pananampalataya'y naka-base lamang sa Bibliya, nguni't kung tutuusi'y naka-base sa TURO ng isang taong kanilang kinikilalang Anghel o Sugo o Paham o Anak ng Diyos.

Kung Bibliya lang ang basehan ng pananampalataya, kahit sino ay maaaring magtayo ng sariling "Iglesya" tulad ng kaso ni Felix Manalo. Ang grupo ng Ang Dating Daan ay nanggaling sa isang break-away group ng mga Iglesya ni Kristo. At kahit si Eli Soriano ay nagpapa-legitimize pa na ang kanyang Iglesya ng Diyos ay siya ring Iglesya ng Diyos ni Nicolas Perez.

Ang mga Born Again ay may bagong pauso: nais nilang ipakita sa mundo na sila'y iisang pananampalataya lamang. Ang totoo niya'y napakarami nilang magkakaiba at magkakasalungat na mga turo. Si Apollo Quiboloy ay nagmula sa kanilang mga ranggo, nguni't hindi naman nila matanggap na si Quiboloy ngayon ang "Son of God."

Ang lahat ng nabanggit ay katulad ng mga imitasyon ng mga "brand names" na ating nakikita sa Divisoria o kaya'y sa mga sidewalk ng Cubao. Nakakuha sila ng mga miyembro dahil nga ang mentalidad ng panahon ay bumabagay sa kanila: "kung hindi mo kaya ang orihinal, punta ka sa imitasyon -- mura na, madali pang palitan." Kaya nga ang mga miyembro ng mga grupong nabanggit ay papalit-palit ng "pananampalataya".

Sa totoo lang, hindi naman talaga pananampalataya ay nakikita sa kani-kanilang paraan ng pagbasa ng Bibliya. Ang tawag sa kanila ay mga "biblical rationalists". "Rationalist" dahil reduktibo at mapag-pili ang kanilang pananaw; mga "biblical rationalist" dahil para sa kanila'y nasa bibliya na lahat ang dapat malaman.

Kahit ang bibliya mismo'y pinasusubalian sila sapagka't kahit si Apostol San Pablo mismo'y magsasabi na hindi lamang ang nasusulat kundi "lahat ng iyong (kay Timoteo) nakita at natutunan sa akin (kay Pablo)" ang batayan ng pananampalataya, sa madaling sabi, Kasulatan at Tradisyon ng mga Apostol, tulad ng nakikita sa nag-iisang Iglesya Katolika.

Para sa karagdagang paliwanag, basahin ang aking "The Word of God and Scriptures" isang artikulong sinulat ko bilang paliwanag sa salitang "Word of God" (Logos tou Theou) at ang relasyon nito sa "Mga Kasulatan".