Magaral Tayo

Isa sa mga katawa-tawang interpretasyon sa Bibliya ng mga ministro ng Iglesya ni Manalo ay ang kanilang paliwanag tungkol sa deklarasyon ni Tomas tungkol Panginoon: "Panginoon ko at Diyos ko!" (Juan 20:28). Sa kanilang paliwanag ay makikitang ang mali nilang paniniwala tungkol sa kalikasan ng Kristo ang nagdadala ng kanilang pang-unawa sa mga talata ng Banal na Kasulatan.

Follow up:

Ayon sa kanila binigkas ni Tomas ang mga salitang "Panginoon ko at Diyos ko!" sa malaking pagkagulat. Sa kanilang pag-unawa, walang iniba ang mga salitang ito sa Mateo 14:26 kung saan nang makita ng mga alagad ang Panginoon na naglalakad sa ibabaw ng tubig ay napasigaw ng "Multo!" Isang paraan na ginagamit ng mga ministro ng Iglesya ni Manalo upang maligaw ang kanilang mga tagapakinig ay ang kanilang estilong tanong-sagot na katulad ng sumusunod:

Ministro 1: Sinasabing ang talata sa Juan 20:28 ay patunay na si Kristo ay Diyos dahil dito'y apostol mismo ang nagsasabi sa Kristo na "Panginoon ko at Diyos ko". Ito ba'y tama?
Ministro 2: Iyan ay mali, sa kadahilanang kahit ang mga apostol ay maaaring magkamali. Sa Mateo 14:26 ay inakala nilang "multo" ang Panginoon. Nang makita ni Tomas ang Panginoon, nasambit niya ang "Panginoon ko at Diyos ko" sa pagkabigla nang makita niya ang Kristong muling nabuhay.

Ganyan ang sinasabi ng mga ministro ng Iglesya ni Manalo upang mapalabo ang tunay na kahulugan ng Juan 20:28. Nguni't para sa isang nag-iisip ang paliwanag nila ay puno ng problema.

Una. Ang mga Judio'y hindi basta-basta bumabanggit ng salitang "Diyos" sa kadahilanang ang ikalawang utos ang nagsasabing "Thou shalt not use the name of the Lord in vain." Hindi sila katulad ng mga Pilipino na maaaring magsabi ng "Dios mio" sa pagkabigla. (Saka wala silang maipakitang talata na "exclamatory" nga ang mga salitang yaon.)
Ikalawa. Bakit pa kailangang tumakbo sa Mateo 14:26 samantalang iba naman ang laman ng aral dito (tingnan ang Nota sa ilalim). Malinaw naman ang mga nakalagay sa Juan 20 ay bakit kailangan pang ipaliwanag sa pamamagitan ng isang talata na wala namang kaugnayan dito. Sa madaling sabi, ang mga ministro ni Manalo ay parang yung tangang nagbasa ng dyaryo sa sinag ng buwan kahit pwede namang magbasa sa liwanag ng bumbilya.
Ikatlo. Ang bersikulo sa 28 ay sagot ni Tomas sa mga salita ng Panginoon sa bersikulo 27:

"Idaiti mo dito ang iyong daliri, at tingnan mo ang aking mga kamay... huwag kang di mapanampalatayahin, kundi mapanampalatayahin"

Kung kaya naman ang bersikulo 28 ay deklarasyon ng pananampalataya ni Tomas. Ang bersikulo 29 ang kumokompirma sa tugon ni Tomas dahil dito'y sumagot ang Panginoon: "Naniniwala ka na ba Tomas dahil ako'y iyong nakita?..."

Ikaapat. Ang mga talata sa Juan 20:1-21:25 ay paanyaya sa pananampalataya sa pamamagitan ng patotoo ng isang alagad na nakakita ng mga bagay na ito (cf. 21:24). Bakit pa niya ikukuwento ay isang "pagkagulat" at "pagkabigla" samantalang ang kanyang layon ay ang pananampalataya ng mga makakarinig sa mga pahayag na ito?

Samakatwid, mali ang turo ng mga ministro ng Iglesya ni Manalo dahil hindi nila inuunawa ang konteksto (malapit man o malawak) ng mga salita ni Tomas sa Juan 20:28.

****************
Nota:
Sa Mateo 14:22-23 ipinapakita ang Kristo ay Panginoon kahit ng unos. Sa mga alagad na pagod, nasa dilim, at natatakot dahil sa mga alon, sila nga'y nagkamali sa pagkilala sa Panginoon. Kaya nga't kinailangan pang ipakilala ng Kristo ang kanyang sarili bilang Panginoon ng karagatan. Sa Juan 20 ang mga alagad ay wala sa gitna ng dagat, sila'y nangagkatipon at ang ilan sa kanila'y nakakita na sa Panginoong muling nabuhay. Ang pagpapakita ng Panginoon sa tagpong ito ay para kay Tomas na wala nuong unang Linggo ng pakikipagtagpo ng Kristo sa kanyang mga alagad.

Links:

• How the cults are twisting the scriptures
• Biblicistic Rationalism